📍Në Distriktin e Jugut, në Pashaliman, u zhvillua me nderim ceremonia e përcjelljes së Kontingjentit VII të anijes “Butrinti” të Forcës Detare/Rojës Bregdetare. Ky kontingjent do të marrë pjesë në operacionin e NATO-s në detin Egje, duke kontribuar në sigurinë dhe stabilitetin rajonal.
Ceremonia u mbajt me prani të Prefektit të Qarkut Vlorë,z. Plator Nesturi, zëvendësshefit të Shtabit të Përgjithshëm të Forcave të Armatosura, gjeneral brigade Altin Kurti dhe Komandantit te Forcës Detare/Rojës Bregdetare, kundëradmiral Adnand Agastra, të cilët vlerësuan kontributin e Forcës Detare në misionet ndërkombëtare.
Misioni ka për qëllim parandalimin e flukseve të emigrantëve të paligjshëm dhe më e rëndësishmja, shpëtimin e jetëve të personave në rrezik në ujërat e detit Egje.
Pjesëmarrja në këtë operacion është një tjetër kontribut i madh për forcimin e imazhit dhe autoritetit të Shqipërisë në arenën ndërkombëtare.
Ceremonia u përmbyll me dorëzimin e Flamurit Kombëtar nga komandanti i Forcës Detare/Rojës Bregdetare nga kundëradmiral Adnand Agastra, te komandanti i kontingjentit, kapiten i rangut të tretë Mario Myftari.
Prefekti i Qarkut Vlorë uron një mision të suksesshëm të Kontingjentit VII të anijes “Butrinti” të Forcës Detare/Rojës Bregdetare , duke kontribuar në ruajtjen e paqes dhe sigurisë rajonale, me siguri dhe kthim të sigurt të tij !
